Martin Luther King Jr
Martin Luther King Jr (Iman: 5 Jenuwari 1929 – 4 Epuren 1968) ìre ogwu Ofifit Amerika òkorere ogwu ikọ Awaji [pastor], ogwu òkirọ inye ibe enwene ubọk irọ-inu me ido [activist], ogwu òkiweek unwọn inyi otutuuk ebilene [humanitarian] mè ogwu ibot me <Civil Rights Movement>. Echubọk iriọọn̄ ọmọ me îrọbe ebi ene ebọkọ unen kiban̄ ekaan̄ sa me esuuk esuuk unye-ibot me ekatimge etim, kpetap ufialek. Ìrọ ikeya igọọk me lek ichechieek eyi Kiristien kan̄. Ọmọ okore ogwu ikọ Awaji me Ntitiin̄ Ebenezer Baptist, me Atilanta, Georgia.
Îtap efuuk enenen isi ikwaan̄ isa irọ inyi ebi ene eriọọn̄ ebe ke îgbe ibe ekefuk ebi otoko geelek ìkike mè ekerọ inu ìkike mèlek otutuuk ebi otoko geelek ike ekirọbe mèlek ebi okuket. Îtumu ikọ [speeches] inyi ebi Ofifit Amerika ibe etumu ekeme mè ekeke eda [protest] ijo orọmijọn̄ iche-lek cha ekirọ me Amerika, ire, ekatim etim mè ìre ìfiat inu.
Sa me isak-oninin̄ [leadership] kan̄, owuwa ebi Ofifit Amerika esasa me esuuk esuuk oniin̄ itim ibọkọ unen kiban̄. Usini otu oniin̄ ema esabe irọ ìre ikwekweek me uwu-ikwaan̄, ire, kpetet ubọk irọ ikwaan̄ geege [sit-in], ijijit inu eyi ebi kpekitap ubọk inyi ema [boycotts], mè ije isasa ijeen̄ unaan̄-ejit [protest matches].