Ikwaan̄ Ukechieen̄ Jisọs Orọbe

Ike Okaan̄-ene Jisọs Karais okije ikana linyọn̄ ikirọ ata inu, îrọ si owuwa inu ukechieen̄. Îre ukpatu ugwem kan̄ òfolek inu ukechieen̄ cha ke etiten̄e inan̄a me ata etip ini cha, mè isa inige me ere yi inye owu òfuk.

Jisọs îgwa owuwa ebi

Jisọs onenikijijen̄e ikana me Galili, mè ikijeen̄ inu me uwu ntitiin̄ ebi Ju, mè ikilook ata etip eyi mkpulu Awaji, mè ikigwa esese chieen̄ orukan̄ mè ufiak me lek ebi ene. Etip kan̄ okekitaan̄ ikana otutuuk ido Siria. Ebi ene ekekikpulu otutuuk ebi chieen̄ orukan̄ geelek okifiak, mè ebi lek okinaan̄, mè ebi ijo erumun̄ okisisaak, mè ebi mkpikpi, mè ebi ngọm, isa ijet Jisọs ibe igwa. Igwagwa otutuuk kiban.

Efet me okwaan̄

Mgbọ Jisọs omun̄be ogbogbo ebi ene cha ìkekeke ikana ọmọ, itutumu inyi ebi udun̄ kan̄ ibe, ema enesaba okwaan̄ ya esi agan̄ keyilọ. Jisọs oneninin̄ emen uji, ọmọ mè ebi udun̄ kan̄, mè ibene ikikọp isaba okwaan̄ oyô ya. Ema mêkikọp me inyọn̄ isi mun̄ ya, egwijo okpọkpọ ibene me ema ekakpọge chieen̄.